सिन्धुलीमा शुक्रबार एक सशस्त्र प्रहरी जवानले आफैले बोकेको हतियारले आफैलाई गोली प्रहार गरेका छन् ।
गोली प्रहारबाट कमलामाई नगरपालिका–११ घर भएका मदन श्रेष्ठ गम्भीर घाइते भएका छन् । श्रेष्ठ सशस्त्र प्रहरी बल नेपाल नं. ५ गण काभ्रे दरबन्दी भई हाल स.प्र.बल आश्रित गुल्म सिन्धुलीमा कार्यरत थिए ।
१३ वर्षीय श्रेष्ठ कमलामाई–५ स्थित मुख्य निर्वाचन अधिकृतको कार्यालय सुरक्षार्थ हतियारसहित खटिएका थिए । राति ९ देखि १२ बजेसम्मको डिउटीमा रहेका उनले साढे १० बजेतिर सोही कार्यालयको प्रशासनिक भबनको शौचालयमा गई आफूले बोकेको एसएमजीबाट आफैलाई चिउडोमा गोली फायर गरेका थिए ।
उनलाई जिल्ला अस्पताल सिन्धुलीमा लगिएकोमा सामान्य उपचारपछि थप उपचारका लागि सशस्त्रको काठमाडौं बलम्बुस्थित अस्पतालमा ल्याएको छ । जिल्ला प्रहरी कार्यालय सिन्धुलीका अनुसार उनको अवस्था गम्भीर छ । घटनाबारे थप अनुसन्धान भइरहेको प्रहरीले जनाएको छ ।
