काठमाडौं । नेपाल राष्ट्र बैंकले पुनर्कर्जा तथा सहुलियतपूर्ण कर्जाको सुविधा खारेज गरेको छ ।
बैंकले हालैमात्र बैंक तथा वित्तीय संस्थाहरूलाई जारी गरिएको एकीकृत निर्देशन, २०७८ संशोधन गर्दै यस्तो व्यवस्था खारेज गरेको हो । राष्ट्र बैंकले निर्देशनको ई.प्रा निर्देशन नं. २ को बुँदा नं. ९ को उप बुँदा ६ को (उ) हटाएको हो ।
यसअघि कोभिड–१९ बाट प्रभावित विभिन्न पेसामा संलग्न पेसागत व्यवसायीहरूलाई प्रदान गरिने कर्जा सो बुँदामा समेटिएको थियो ।
यस्तै, कोभिड–१९ का कारण अति प्रभावित, मध्यम प्रभावित उद्योग व्यवसायी तथा पेसाकर्मीहरूलाई प्रदान गरिएको कर्जाको पुनर्तालिकीकरण तथा पुनर्संरचना लगायतका सम्पूर्ण सुविधा समेत राष्ट्र बैंकले यसै संशोधनमार्फत कटौती गरेको छ । आर्थिक वर्ष २०७९/८० को मौद्रिक नीतिले लिएको नीति सोही कार्यान्वयनका लागि बैंकले यस्तो सुविधा हटाएको हो ।
