काठमाडौं । नेपाल प्रहरीका प्रहरी महनिरीक्षक (आईजीपी) वसन्तबहादुर कुँवरले पदभार सम्हालेको भोलिपल्टै चार डिआइजीलाई एआइजी बढुवामा सिफारिस गरेर प्रहरीभित्र सरुवा र बढुवामा देखिंदै आएको विवाद हटाउने संकेत देखाएका छन् ।
गृहसचिव विनोद प्रकाश सिंह नेतृत्वको बढुवा समितिको सोमबारको बैठकले डिआईजीहरु सन्दीप भन्डारी, सुदीप गिरी, मिरा चौधरी र टेक बहादुर तामाङको बढुवा सिफारिस गरेको हो ।
बरियतामा अघि रहेकालाई नै बढुवा सिफारिस गरिएको छ । आईजीपी कुँवरले पदबहाली गरेको दोस्रो दिन नै एआइजी बढुवा निकाल्न सफल भएका हुन् । बढुवा समितिमा आईजीपी सदस्य सचिव रहने व्यवस्था छ ।
यसअघि तत्लो दर्जाका प्रहरी अधिकारीहरुको सरुवादेखि माथिल्लो तहका प्रहरी अधिकारीहरुको सरुवा र बढुवामा विवाद हुँदै आएको थियो । विवादकै कारण बढुवा प्रकृया लम्बिने गरेकोमा आईजीपी कुँवरले भने पद सम्हालेकै भोलीपल्ट एआईजी बढुवाका लागि सिफारिस गर्न सफल भएका हुन् ।
बरियताक्रम अनुसार नै बढुवा सिफारिस गरिएको हुँदा प्रहरीभित्र देखिंदै आएको विवाद पनि आईजीपी कुँवरकै कार्यकालबाट हट्न देखिन्छ ।
