काठमाडौँ । नेपाली कांग्रेसले आगामी निर्वाचनका लागि समानुपातिकतर्फ उम्मेदवारको सूची (आज ) सोमबार टुंग्याउँदैछ ।
उम्मेदवारको सूची तयार गरेर सोमबारै निर्वाचन आयोगमा बुझाउने तयारी छ । नेताहरु संसदीय समितिमा उम्मेदवार छान्न चार दिनदेखि छलफलमा छन् ।
बालुवाटारमा आज पनि छलफल चलिरहेको छ।
प्रधानमन्त्री शेरबहादुर देउवा निवास बालुवाटारमा बसिरहेको बैठकमा दिउँसो १ बजेसम्म नामहरुमा सहमति जुट्न सकेको छैन । बैठकमा सहभागी एक नेताका अनुसार सात प्रदेशको छुट्टाछुट्टै बैठक बसिरहेको छ ।
केन्द्रीय संसदीय समितिमा छलफल गरेर समानुपातिक उम्मेदवारको सूची आजै दिउँसो केन्द्रीय कार्यसम्पादन समिति बैठक गरी पारित गरेर निर्वाचन आयोगमा पेश गर्ने तयारी छ।
प्रतिनिधि सभातर्फ ११० र प्रदेश सभातर्फ २२० उम्मेदवार छनौट गर्नुपर्ने हुन्छ। दलहरुले समानुपातिक तर्फको नाम समावेशीताका आधारमा बुझाउनुपर्दछ ।
बन्द सूचीमा महिलाको संख्या ५० प्रतिशत अनिवार्य गरिएको छ ।
मंसिर ४ गते हुने प्रतिनिधि सभा र प्रदेश सभा चुनावका लागि निर्वाचन आयोगले आइतबार र सोमबार समानुपातिकतर्फ उम्मेदवारको बन्दसूची पेश गर्न दलहरूलाई समय दिएको थियो।
