२०८० जेष्ठ १६, मंगलवार १७:५८ बजे
काठमाडौं, जेठ १६ः नेपाल प्रहरीमा रिक्त ४४ प्रहरी निरीक्षकको बढुवा पेचिलो बनिरहेका बेला प्रहरी उपरीक्षक र प्रहरी नायव उपरीक्षकको सरुवा चर्चा चलेपछि चलखेल बढ्न थालेको छ ।
४४ निरीक्षक बनाउनु पर्नेमा १ सय ४४ प्रतिष्पर्धी भएपछि बढुवा गर्न फलामको चिउरा चपाए झैं भएपनि जति ढिला गर्यो त्यति आर्थिक चलखेल हुने कुरालाई प्रहरी नेतृत्वले बुझ्न जरुरी छ ।
विगतमा मालदार ठाउँमा बसेर काम भन्दा दाम राम्रो सँग मारेका प्रहरी निरीक्षक बिचौलीया मार्फत थैलीभेटी बोकेर शक्तिकेन्द्र धाउँदै हिडेका छन् ।
प्रहरी नेतृत्वले यस पटक कार्य सम्पादन र कार्य क्षमता लगायत कृयाशिलतालाई हेरेर न्याय नगरे काम गर्ने प्रहरी निरीक्षक जुन जोगी आएपनि कानै चिरेको भन्ने कहानी सम्झन बाध्य हुने छन् ।
एकातिर प्रहरी नायव उपरीक्षक बढुवाको जति चर्चा छ त्यति नै चर्चा विभिन्न जिल्लाका इन्चार्ज र प्रहरी नायव उपरीक्षकको सरुवा हुने कुराले पाएको छ । दश महिना पुगेका केही जिल्लाका प्रहरी उपरीक्षकको सरुवाको चर्चा सँगै जिल्ला कमाण्डर बन्नका लागि केही प्रहरी उपरीक्षक शक्तिकेन्द्र धाउन र नाता सम्बन्ध गाँस्न थालेका छन् ।
दश महिना पुगेका प्रहरी उपरीक्षकमा रौतहट बीरबहादुर बुढा, कास्की अजय केसी, उदयपुर ज्ञानेन्द्र फुयाल, नुवाकोट रमेश पंडित, बारा होबिन्द्र बोगटी, मकवानपुर बामदेव गौतम, कपिलवस्तु प्रेम बस्नेत, इलाम दिलिप घिमिरे र सुनसरी प्रभु ढकाल रहेका छन् ।
