वीरगञ्ज २ अषाढ
एक दशकदेखि बालबालिका, किशोरकिशोरी र युवाका विभिन्न क्षेत्रमा वकालत तथा अभियान सञ्चालन गर्दै आइरहेको सामाजिक संस्था युवालयले बालअधिकार मूलप्रवाहिकरणमा स्थानीय तह विषयमा मधेश प्रदेशको पर्सा जिल्लास्थित पर्सागढी नगरपालिकामा स्थानीय तहका निर्वाचित प्रतिनिधि र सरोकारवाला निकायको उपस्थितिमा नीति संवाद कार्यक्रम सम्पन्न गरेको छ ।
कार्यक्रममा पर्सागढीका नगर प्रमुख गोकर्ण पाठकले आगामी वर्षका लागि बजेट तथा योजना निर्माण हुँदै गरेको अवस्थामा नगरपालिकामा बालबालिका तथा किशोरकिशोरीको अवस्था तथा आवश्यकताका बारेमा संवाद गरिनु निकै अर्थपूर्ण रहेको बताए ।
नगरपालिकामा रहेका २ वटा वडा बालमैत्री भइसकेको अवस्थामा अब पर्सागढीलाई छिट्टै बालमैत्री बनाउन युवालय लगायत सम्पूर्ण सरोकार राख्ने निकायको सहयोग आवश्यक रहने प्रमुख पाठकले बताए ।
त्यस्तै, नगरपालिकाका प्रमुख प्रशासकीय अधिकृत छविरमण भट्टराईले नगरपालिकाले बनाउने योजनामा बालबालिकासँग सरोकार राख्ने विषयलाई उच्च महत्वका साथ कार्यन्वयन गरिने प्रतिबद्धता व्यक्त गरे ।
कार्यक्रममा सहभागी पर्सागढी नगरपालिकाका विभिन्न शाखाका प्रमुखहरू, विद्यालयका प्रधानाध्यापक, बाल क्लबका प्रतिनिधि, आमा समूह, युवा क्लब, स्वास्थ्य स्वयंसेविका तथा नगरपालिकामा सकृय स्थानीयहरूले बालबालिकाका क्षेत्रमा काम गर्न, सहयोग र सहकार्य गर्न तयार रहेको बताए ।
युवालयका सहजकर्ता राहुल शाहले पर्सागढीमा बालबालिकाका विषयमा विभिन्न कार्यक्रम गरिँदै आएको र आगामी वर्ष यसलाई अझ प्रभावकारी बनाउँदै लगिने बताए ।
त्यस्तै, युवालयका कोषाध्यक्ष धर्मराज रिमालले बालबालिका तथा किशोरकिशोरीका लागि कार्यक्रम निर्माण गर्दै गर्दा उनीहरूको अर्थपूर्ण सहभागितालाई प्रवर्द्धन गर्न नगरपालिकाको ध्यानाकर्षण गराए ।
बाल अधिकारको सुनिश्चितता र बाल सहभागिताको प्रतिबद्धतामा प्राथमिकता दिन सकेमा पर्सागढी नगरपालिका छिट्टै नै बालमैत्री हुने र यसका लागि सहकार्य गर्न युवालय सदैव तयार रहेको प्रतिबद्धता
व्यक्त गरे ।