जनकपुरधाम । सशस्त्र प्रहरीका असई थमन विक हत्या प्रकरणमा जन्मकैदको सजाय निर्धारण भएका मधेश प्रदेशसभा सदस्य अभिराम शर्माको निलम्बन फुकुवा गरिएको छ। मधेश प्रदेशसभा सचिवालयले असोज २६ गतेदेखि लागू हुने गरी उनको निलम्बन फुकुवा भएको जनाएको हो।
तत्कालीन लोकतान्त्रिक समाजवादी पार्टी (लोसपा) बाट मधेश प्रदेशसभा सदस्य बनेका शर्मा हाल जसपा नेपालमा आबद्ध छन्। थमन विक हत्या प्रकरणमा अदालतको फैसला आएपछि उनलाई प्रदेशसभाले २०८१ वैशाख १८ गते निलम्बन गरेको थियो।
उक्त मुद्दामा उच्च अदालत हुँदै सर्वोच्च अदालतसम्म पुगेका शर्मा सर्वोच्च अदालतको आदेशपछि साधारण तारेखमा रिहा भएका थिए। सर्वोच्च अदालतले २०८३ असोज २३ गते उनलाई साधारण तारेखमा राख्ने आदेश दिएको प्रदेशसभा सचिवालयको सूचनामा उल्लेख छ।
प्रदेशसभा सचिव वासुप्रसाद कोइरालाद्वारा जारी सूचनाअनुसार मुलुकी फौजदारी कार्यविधि संहिता, २०७४ को दफा १३७ को उपदफा (२) बमोजिम सर्वोच्च अदालतबाट प्रदान गरिएको सुविधाका आधारमा उनको निलम्बन फुकुवा गरिएको हो।
मधेश प्रदेशसभा नियमावली, २०८२ को नियम २१९ को उपनियम (५) बमोजिम सभामुखले शर्माको निलम्बन फुकुवा गरेको सूचनामा जनाइएको छ।
थमन विक हत्या प्रकरणमा जिल्ला अदालत महोत्तरीले शर्मालाई जन्मकैदको सजाय निर्धारण गरेको थियो। उक्त फैसलाविरुद्ध उनले माथिल्लो अदालतमा पुनरावेदन गरेका थिए।
सर्वोच्च अदालतबाट साधारण तारेखमा रिहा भएपछि प्रदेशसभा सदस्यको निलम्बन फुकुवा भएको भए पनि यसलाई मुद्दाको अन्तिम फैसला वा आरोपबाट सफाइ पाएको अर्थमा बुझ्न मिल्दैन। अदालतको आदेश र मुद्दाको अन्तिम न्यायिक निरूपण अलग विषय हुन्।
तपाईको प्रतिक्रिया !