जमुई । भारतको बिहारस्थित जमुईमा ऋणको किस्ता उठाउन घर आउने वित्तीय संस्थाका कर्मचारीसँग प्रेममा परेकी एक विवाहित महिलाले आफ्ना श्रीमान् छाडेर ती कर्मचारीसँग विवाह गरेकी छन्। सामान्य चिनजानबाट सुरु भएको सम्बन्ध प्रेममा परिणत भएपछि उनीहरूले घर छाडेर विवाह गरेको समाचार सार्वजनिक भएको छ।
समाचारअनुसार इन्दिरा कुमारीको विवाह सन् २०२२ मा नाकुल शर्मासँग भएको थियो। इन्दिराले आफ्ना श्रीमान्ले मदिरा सेवन गरेर आफूलाई कुटपिट गर्ने तथा दुःख दिने गरेको आरोप लगाएकी छन्।
यसै क्रममा ऋणको किस्ता उठाउन घर आउने पवन कुमार यादवसँग उनको चिनजान भएको थियो। चिनजानपछि उनीहरूबीच मित्रता बढ्दै जाँदा प्रेम सम्बन्धमा परिणत भएको बताइएको छ। करिब पाँच महिनासम्म गोप्य सम्बन्धमा रहेका उनीहरू फेब्रुअरी ४ मा घर छाडेर पश्चिम बंगालको आसनसोल पुगेका थिए।
केही दिनपछि फर्किएका उनीहरूले फेब्रुअरी ११ मा मन्दिरमा हिन्दू परम्पराअनुसार विवाह गरेको समाचारमा उल्लेख छ।
विवाहपछि भने उनीहरूको सम्बन्धलाई लिएर पारिवारिक विवाद सुरु भएको छ। पवनको परिवारले विवाह स्वीकार गरे पनि इन्दिराको परिवारले विरोध जनाएको र पवनविरुद्ध प्रहरीमा उजुरी दिएको बताइएको छ।
इन्दिराले आफूले आफ्नै इच्छाले पवनसँग विवाह गरेको बताएकी छन्। परिवारबाट धम्की आउन सक्ने आशङ्काका कारण नवविवाहित जोडीले सुरक्षासमेत मागेको समाचारमा उल्लेख छ।
घटनाले व्यक्तिगत सम्बन्ध, पारिवारिक असहमति र वैवाहिक निर्णयलाई लिएर स्थानीयस्तरमा चर्चा पाएको छ।
तपाईको प्रतिक्रिया !