एउटै परिवारका तीन दाजुभाइ तीन सुरक्षा निकायमा, दुई जनालाई उत्कृष्ट कमाण्डरको सम्मान

काठमाडौं । एउटै परिवारका तीन दाजुभाइ, तीन फरक सुरक्षा निकाय र तीनै जना अधिकृत तहमा । नेपाल प्रहरी, नेपाली सेना र सशस्त्र प्रहरी बलमा जिम्मेवारी सम्हालिरहेका घिमिरे परिवारका तीन दाजुभाइको पेसागत यात्रा रोचक संयोग बनेको छ । त्यसमाथि नेपाल प्रहरीका एसएसपी दिलिप घिमिरे र सशस्त्र प्रहरी बलका एसएसपी विकास घिमिरेले उत्कृष्ट कार्यसम्पादनका लागि सम्मानसमेत पाएका छन् ।

ललितपुरको लेले स्थायी घर भएका घिमिरे परिवारको सुरक्षा सेवासँगको सम्बन्ध अहिलेको पुस्तामा मात्रै सीमित छैन । परिवारका हजुरबा जितबहादुर घिमिरे प्रथम विश्वयुद्धको समयमा नेपाली सेनामा क्याप्टेन थिए । हजुरबाको पुस्ताबाट सुरु भएको सैन्य सेवाको सम्बन्ध अहिलेका सन्तानसम्म आइपुग्दा तीन फरक सुरक्षा निकायमा विस्तार भएको छ ।

तीन दाजुभाइ, तीन फरक सुरक्षा निकाय

तीन दाजुभाइमध्ये जेठा दिलिप घिमिरे नेपाल प्रहरीका वरिष्ठ प्रहरी उपरीक्षक (एसएसपी) हुन् । उनी हाल जिल्ला प्रहरी परिसर काठमाडौंको नेतृत्वमा छन् । २०५८ सालमा प्रहरी निरीक्षकबाट सेवा प्रवेश गरेका दिलिपले इलाम र रौतहटलगायत जिल्लामा प्रहरी प्रमुखका रूपमा जिम्मेवारी निर्वाह गरिसकेका छन् ।

माहिला भाइ पवन घिमिरे नेपाली सेनामा लेफ्टिनेन्ट कर्णेल छन् । उनले २०५६ सालमा सेकेन्ड लेफ्टिनेन्टका रूपमा सैनिक सेवा सुरु गरेका थिए ।

कान्छा भाइ विकास घिमिरे सशस्त्र प्रहरी बलका एसएसपी हुन् । २०५९ सालमा प्रहरी निरीक्षकका रूपमा सशस्त्र प्रहरी सेवामा प्रवेश गरेका उनी हाल कुरिनटारस्थित सशस्त्र प्रहरी विपद् तालिम निर्देशनालयको प्रमुख छन् ।

तीनै भाइ फरक संगठनमा रहेर राज्यको सुरक्षा व्यवस्थामा योगदान दिइरहेका छन् । उनीहरूको जिम्मेवारी र कार्यक्षेत्र फरक भए पनि पेसागत रूपमा राज्यको सेवा गर्ने साझा प्रतिबद्धता रहेको परिवारका सदस्यहरू बताउँछन् ।

दुई दाजुभाइलाई उत्कृष्टताको सम्मान

घिमिरे परिवारको चर्चा हुनुको अर्को कारण दुई दाजुभाइले पाएको उत्कृष्टताको सम्मान हो ।

२०७९ असोजमा जिल्ला प्रहरी कार्यालय इलामको नेतृत्व गरिरहेका बेला दिलिप प्रहरी दिवसका अवसरमा उत्कृष्ट घोषित हुँदै पुरस्कृत भएका थिए । त्यसैगरी, सशस्त्र प्रहरी बलको वार्षिक निरीक्षणका क्रममा दक्षिणकाली गणमा कार्यरत विकास पनि उत्कृष्ट घोषित भएका थिए ।

दुई फरक सुरक्षा संगठनमा जिम्मेवारी निर्वाह गरिरहेका दाजुभाइले एउटै वर्षमा प्राप्त गरेको यो सम्मान परिवारका लागि विशेष उपलब्धि बन्यो ।

प्रहरी संगठनमा जिल्ला प्रमुखको जिम्मेवारी शान्ति सुरक्षा कायम गर्ने, अपराध अनुसन्धान प्रभावकारी बनाउने, प्रहरी परिचालन गर्ने र नागरिकलाई सेवा प्रदान गर्नेसँग जोडिन्छ । त्यस्तै, सशस्त्र प्रहरी बलमा विपद् व्यवस्थापन तथा तालिमसम्बन्धी जिम्मेवारीले विपद्का बेला आवश्यक जनशक्ति तयार पार्न र परिचालन गर्न महत्त्वपूर्ण भूमिका खेल्छ ।

आफ्नो पेसागत यात्राबारे दिलिप भन्छन्, ‘हाम्रो परिवार नै देश र जनतामा समर्पित छ, यो सायद सबै परिवारमा हुँदैन, हामी खुसी छौँ । तर फरक पृष्ठभूमि र जिम्मेवारीका कारण परिवारसँग विरलै भेट हुँदा अलि नरमाइलो लाग्छ ।’

सुरक्षा सेवासँग पुस्तौँदेखिको सम्बन्ध

घिमिरे परिवारको सुरक्षा सेवासँगको सम्बन्धको जरो हजुरबा जितबहादुर घिमिरेसम्म पुग्छ । पारिवारिक विवरणअनुसार उनी प्रथम विश्वयुद्धका समयमा नेपाली सेनामा क्याप्टेन थिए । तत्कालीन समयमा नेपाली सैनिक ब्रिटिस पक्षबाट विभिन्न युद्धमा सहभागी भएका थिए ।

हजुरबाको पुस्तामा सेनासँग जोडिएको परिवारको सम्बन्ध पछिल्ला पुस्तामा विभिन्न सुरक्षा संगठनसम्म फैलिएको छ । अहिले तीन भाइमध्ये एक जना नेपाल प्रहरीमा, अर्को नेपाली सेनामा र तेस्रो सशस्त्र प्रहरी बलमा कार्यरत छन् ।

विकास घिमिरेका अनुसार पारिवारिक पृष्ठभूमिले पनि उनीहरूलाई सुरक्षा सेवातर्फ आकर्षित गरेको हो ।

‘पारिवारिक पृष्ठभूमिले हामीलाई सुरक्षा सेवामा पुर्‍याएको हो,’ विकास भन्छन्, ‘यो संयोगमात्रै होइन । पहिला जेठो दाइ दिलिप प्रहरीमा भर्ना हुनुभयो, माइलो दाइ सेना सेकेन्ड लेफ्टिनेन्टमा र पछि म सशस्त्र प्रहरीमा इन्स्पेक्टरमा भर्ना भएँ ।’

उनका अनुसार सुरक्षा निकायमा अधिकृतका रूपमा काम गर्नु व्यक्तिगत करिअर निर्माणमा मात्रै सीमित हुँदैन । अनुशासन, जिम्मेवारीबोध, संगठनप्रतिको प्रतिबद्धता र मातहतका कर्मचारीको नेतृत्व पनि त्यसका अभिन्न पक्ष हुन् ।

परिवारका सदस्य पनि सुरक्षा र सेवामै

घिमिरे परिवारको सुरक्षा सेवासँगको सम्बन्ध तीन दाजुभाइमा मात्रै सीमित छैन । दिलिपकी पत्नी वसुन्धरा खड्का नेपाल प्रहरीकी प्रहरी उपरीक्षक (एसपी) हुन् । उनी हाल जिल्ला प्रहरी कार्यालय झापाको प्रमुखका रूपमा कार्यरत छिन् ।

त्यस्तै, विकासकी पत्नी डा. समृद्धि बस्नेत सशस्त्र प्रहरी अस्पतालमा चिकित्सकका रूपमा कार्यरत छिन् । यसरी परिवारका सदस्यहरू प्रत्यक्ष सुरक्षा परिचालनदेखि प्रहरी नेतृत्व र स्वास्थ्य सेवासम्मका क्षेत्रमा संलग्न छन् ।

विकास र समृद्धिको भेट पनि सुरक्षा सेवाकै सिलसिलामा भएको थियो । सशस्त्र प्रहरी सेवामा प्रवेश गरेपछि समृद्धिसँग नजिकिएका विकासले पछि उनीसँग विवाह गरेका हुन् ।

‘संयोग नै मान्नुपर्छ, परिवार सबै सुरक्षा निकायसँग जोडिएका बेला समृद्धिसँग मेरो मन जोडियो,’ विकास सम्झन्छन्, ‘अग्रज दाइहरूले बुहारी पनि फौजमै रहेकाले सहजै स्वीकार्नुभयो ।’

जिम्मेवारीले टाढा बनाएको पारिवारिक भेटघाट

सुरक्षा सेवामा कार्यरत हुनुको एउटा चुनौती परिवारसँग पर्याप्त समय बिताउन नपाउनु पनि हो । फरक–फरक स्थान र जिम्मेवारीमा खटिनुपर्ने भएकाले घिमिरे परिवारका सदस्यलाई एकै ठाउँमा भेला हुन सहज छैन ।

विकास अहिले कुरिनटारमा कार्यरत छन् भने उनकी पत्नी समृद्धि बलम्बुस्थित सशस्त्र प्रहरी अस्पतालमा छिन् । कामको प्रकृति र बिदाको अनिश्चितताका कारण उनीहरूलाई नियमित भेटघाट गर्नसमेत कठिन हुने गरेको छ ।

‘म अहिले कुरिनटारमा छु, उनी बलम्बुमा छिन् । जिम्मेवारी फरक भएकाले भनेको समयमा बिदा पाइँदैन । कहिलेकाहीँ त ६ महिनासम्म पनि मेरो र समृद्धिको भेट हुँदैन,’ विकास भन्छन् ।

चाडपर्वमा परिवारका सबै सदस्य एकै ठाउँमा भेला हुन नपाउँदा यो दूरी अझ खट्किन्छ । सुरक्षा सेवाको जिम्मेवारीले परिवारका सदस्यलाई देशका विभिन्न स्थानमा पुर्‍याए पनि उनीहरूको साझा पेसागत उद्देश्य भने एउटै छ ।

खुसी साट्ने बेला आमाबुबा छैनन्

घिमिरे परिवारका लागि सफलतासँगै भावुक बनाउने अर्को पक्ष पनि छ । तीनै दाजुभाइले पेसागत जीवनमा जिम्मेवारी र सम्मान प्राप्त गर्दै जाँदा उनीहरूका आमाबुबा भने साथमा छैनन् ।

सन्तानलाई दुःख गरेर हुर्काएका आमाबुबाले उनीहरू सुरक्षा सेवामा प्रवेश गरेको र जिम्मेवारी सम्हालेको देख्न पाए पनि पछिल्ला उपलब्धिको खुसी साट्न भने पाएनन् ।

‘हामीलाई बाबुआमाले दुःखले हुर्काउनुभयो । अहिले परिवार नै देश र जनताको सुरक्षामा समर्पित छ । सुख पाउने र खुसी साट्ने बेला आज हामीसँग बाबुआमा हुनुहुन्न,’ विकास सम्झन्छन्, ‘परिवारको मियो नै नहुँदा कहिलेकाहीँ नरमाइलो लाग्छ, खासगरी चाडपर्वमा ।’

घिमिरे परिवारको कथा तीन दाजुभाइले तीन सुरक्षा निकायमा उच्च जिम्मेवारी सम्हालेको संयोगमा मात्रै सीमित छैन । पुस्तौँदेखिको सुरक्षा सेवाको विरासत, पेसागत उपलब्धि, परिवारका सदस्यहरूको साझा समर्पण र जिम्मेवारीका कारण टाढिनुपरेको पारिवारिक जीवनसमेत यसमा जोडिएको छ ।

एउटै परिवारका सदस्य भए पनि उनीहरूको कार्यक्षेत्र र दायित्व फरक छन् । तर तीनै दाजुभाइको व्यावसायिक यात्राले परिवारको इतिहाससँगै राज्यको सुरक्षा सेवामा समर्पित जीवनका फरक आयाम उजागर गर्छ ।