चितवन, ६ कात्तिक । भोटेकोशी र बूढीगण्डकीमा आएको बाढीपछि मुख्य राजमार्गको अवरोध हटे पनि पुनः बाटो बन्द हुने आशङ्काले यस वर्षको दसैँमा चितवनको प्रमुख पर्यटकीय गन्तव्य सौराहामा आन्तरिक पर्यटकको चहलपहल घटेको छ ।
विगतका वर्षमा दसैँ बिदाका बेला पर्यटकले भरिभराउ हुने सौराहामा यस वर्ष अपेक्षाकृत कम पर्यटक आएका छन् । होटल व्यवसायीका अनुसार बाढी र वर्षाका कारण यात्रा प्रभावित हुने डर तथा प्राकृतिक विपत्तिले सिर्जना गरेको परिस्थितिले आन्तरिक पर्यटकको आगमनमा असर पारेको छ ।
क्षेत्रीय होटल सङ्घ चितवनका अध्यक्ष ओमप्रकाश पाण्डेका अनुसार उनको सौराहास्थित होटल ल्याण्डमार्कमा बिहीबार ७५ कोठामध्ये सातवटा मात्रै बुकिङ भएका थिए ।
“सौराहा मात्रै होइन, निकै चहलपहल हुने पोखरामा पनि यस वर्ष विगतजस्तो आन्तरिक पर्यटक छैनन्,” उनले भने ।
पाण्डेका अनुसार भोटेकोशी र बूढीगण्डकीको बाढीबाट भएको जनधनको क्षतिले पनि यस वर्ष दसैँको उत्साहमा असर पारेको छ । यद्यपि, बाढीपछि स्थगित भएका बुकिङ पुनः हुन थालेका छन् । नयाँ बुकिङसमेत आउन थालेकाले आगामी दिनमा आन्तरिक तथा बाह्य पर्यटक बढ्ने उनको अपेक्षा छ ।
दसैँ बिदामा पर्यटक बढ्ने व्यवसायीको आशा
होटल व्यवसायी सुमन घिमिरेले शुक्रबारदेखि सौराहामा आन्तरिक पर्यटकको सङ्ख्या क्रमशः बढ्ने अपेक्षा व्यक्त गरे । दसैँ बिदा र लगातारका बिदाका कारण शुक्रबार, शनिबार र आइतबार होटलहरू भरिने उनको अनुमान छ ।
उनका अनुसार यस वर्ष अहिलेसम्म विगतका दसैँमा जस्तो चहलपहल देखिएको छैन । तर, पर्यटकको आगमन बढ्दै जाने र आगामी महिनाहरूमा पर्यटन गतिविधि विस्तार हुनेमा उनी आशावादी छन् ।
होटल भिष्टाका सञ्चालक रमेश सिलवालले पनि दसैँसँगै आन्तरिक पर्यटक आउने अपेक्षा गरेका छन् । उनका अनुसार दसैँको समयमा केही विदेशी पर्यटक सौराहा आएका छन् भने भारतीयसहित अन्य देशका पर्यटकले सोधपुछ र बुकिङ गर्न थालेका छन् ।
भोटेकोशी बाढीका कारण यसअघि धेरै पर्यटकले बुकिङ रद्द गर्दा व्यवसायीले ठूलो आर्थिक नोक्सानी व्यहोर्नुपरेको थियो । अहिले रोकिएका बुकिङ पुनः हुन थालेपछि व्यवसायीमा आशा पलाएको छ ।
विदेशी पर्यटकको आगमनले व्यवसायीलाई राहत
आन्तरिक पर्यटकको आगमन कमजोर भए पनि सौराहाका केही होटलमा विदेशी पर्यटकको उपस्थिति उत्साहजनक देखिएको छ ।
वनबास रिसोर्ट सौराहाका महाप्रबन्धक प्रकाश न्यौपानेका अनुसार दसैँका बेला उनको होटल लगातार तीन दिन विदेशी पर्यटकले भरिएको थियो । जर्मनी, डेनमार्क, बेल्जियम, अस्ट्रेलिया र अमेरिकाबाट आएका पर्यटकले होटलका कोठा भरिएको उनले बताए ।
न्यौपानेका अनुसार बाढीपछि रोकिएका पर्यटक अहिले नेपाल आउन थालेका छन् र उनीहरू सौराहा पनि पुगिरहेका छन् । यद्यपि, स्वदेशी पर्यटकको बुकिङ भने कमजोर रहेको उनले बताए ।
वन्यजन्तु र सफारी पर्यटनको प्रमुख गन्तव्य सौराहा
चितवन राष्ट्रिय निकुञ्जको प्रवेशद्वारका रूपमा परिचित सौराहा वन्यजन्तु अवलोकन र सफारी पर्यटनका लागि लोकप्रिय गन्तव्य हो । निकुञ्ज तथा आसपासका मध्यवर्ती सामुदायिक वन घुम्न आउने पर्यटकमध्ये धेरैजसो सौराहामा बस्ने गर्छन् ।
भरतपुरका पटिहानी, जगतपुर र मेघौली क्षेत्र पनि पर्यटकका आकर्षक गन्तव्य हुन् । यहाँ आउने पर्यटकले हात्ती सफारी, जिप सफारी, डुङ्गा यात्रा तथा पैदल भ्रमणमार्फत निकुञ्ज र मध्यवर्ती वन क्षेत्रको अवलोकन गर्छन् ।
एकसिङ्गे गैँडा, पाटेबाघलगायत दुर्लभ वन्यजन्तु हेर्न तथा थारू समुदायको संस्कृति र परम्पराबारे जान्न पनि पर्यटक चितवन पुग्ने गर्छन् ।
देशको प्रमुख पर्यटकीय गन्तव्यका रूपमा रहेको चितवनको पर्यटन व्यवसायमा आन्तरिक पर्यटकको ठूलो योगदान छ । त्यसैले दसैँको समयमा स्वदेशी पर्यटकको आगमन घट्दा होटल तथा पर्यटन व्यवसायी प्रभावित भएका छन् ।
यद्यपि, विदेशी पर्यटकको आगमन र स्थगित बुकिङ पुनः सुरु हुन थालेकाले आगामी दिनमा सौराहाको पर्यटन व्यवसायमा सुधार आउने अपेक्षा व्यवसायीले गरेका छन् ।
तपाईको प्रतिक्रिया !