वीरगंज। पर्सा निर्वाचन क्षेत्र नम्बर–४ का राष्ट्रिय स्वतन्त्र पार्टी (रास्वपा) का उम्मेदवार टेकबहादुर शाक्यले चुनावी प्रचारप्रसारका क्रममा निर्वाचन आचारसंहिता विपरीत बालबालिकालाई खुला रूपमा प्रयोग गरेको आरोप लागेको छ।
स्थानीयवासीका अनुसार उम्मेदवार शाक्यको चुनावी अभियानमा विद्यालय जाने उमेरका बालबालिकालाई र्याली, जुलुस तथा विभिन्न प्रचार गतिविधिमा सहभागी गराइएको देखिएको छ। निर्वाचन आयोगले जारी गरेको आचारसंहितामा बालबालिकालाई कुनै पनि प्रकारको चुनावी प्रचारमा प्रयोग गर्न स्पष्ट रूपमा निषेध गरिएको भए पनि उक्त नियमको ठाडो उल्लङ्घन भएको स्थानीयको गुनासो छ।
यस किसिमका गतिविधिले निर्वाचनको मर्यादा, निष्पक्षता र बालअधिकारमाथि गम्भीर प्रश्न उठाएको भन्दै स्थानीय सर्वसाधारणले तीव्र असन्तोष व्यक्त गरेका छन्। उनीहरूले निर्वाचन आयोग तथा सम्बन्धित प्रशासनिक निकायलाई तत्काल अनुगमन गरी दोषीमाथि कडा कारबाही गर्न माग गरेका छन्।
बालबालिकालाई राजनीतिक स्वार्थका लागि प्रयोग गर्नु कानुन, नैतिकता र लोकतान्त्रिक मूल्यविपरीत भएको बताउँदै स्थानीयहरूले यस्ता गतिविधि रोक्न ढिलाइ भए निर्वाचन प्रक्रियामाथि नै जनविश्वास कमजोर हुने चेतावनी दिएका छन्।
यस विषयमा उम्मेदवार टेकबहादुर शाक्य वा राष्ट्रिय स्वतन्त्र पार्टी (रास्वपा) को तर्फबाट हालसम्म कुनै आधिकारिक प्रतिक्रिया प्राप्त हुन सकेको छैन।
