वीरगंज । मधेस प्रदेश सरकारअन्तर्गतको यातायात व्यवस्था कार्यालय, बारामा सवारी चालक अनुमतिपत्र (लाइसेन्स) को लिखित तथा प्रयोगात्मक परीक्षा सञ्चालनको तयारी भइरहेका बेला बिचौलियाहरू सक्रिय भएको आरोप लागेको छ। लाइसेन्स परीक्षामा उत्तीर्ण गराइदिने आश्वासन दिँदै बारा, पर्सा र मकवानपुरका विभिन्न स्थानमा परीक्षार्थीबाट रकम असुली भइरहेको स्रोतले दाबी गरेको छ।
कार्यालयले बिहीवारदेखि अटोरिक्शा, टेम्पो, मोटरसाइकल, स्कुटर, कार, जीप, ट्रक, लरी, मिनीबस तथा मिनीट्रकलगायतका सवारीसाधनको लिखित र प्रयोगात्मक परीक्षा सञ्चालन गर्ने तयारी गरेको बताइएको छ। परीक्षा सञ्चालनको सूचना सार्वजनिक भएसँगै विभिन्न समूहका व्यक्तिहरू परीक्षार्थीबाट रकम उठाउन सक्रिय भएको स्रोतको भनाइ छ।
स्रोतका अनुसार वीरगंज क्षेत्रमा मात्रै आठदेखि १० जनासम्मको समूह बिचौलियाका रूपमा सक्रिय रहेको दाबी गरिएको छ। उक्त समूहले हलुका तथा हेभी सवारीसाधनको लाइसेन्स मिलाइदिने भन्दै परीक्षार्थीसँग रकम माग्ने गरेको बताइएको छ। विगतको तुलनामा दोब्बरसम्म रकम माग्ने गरिएको आरोपसमेत लागेको छ।
लाइसेन्स वितरण प्रक्रियालाई पारदर्शी, व्यवस्थित र बिचौलियामुक्त बनाउने उद्देश्यले प्रदेश सरकारले सुधारका प्रयास गरिरहेका बेला रकम असुलीको आरोप सार्वजनिक भएको हो। यसले परीक्षा प्रणालीको निष्पक्षता तथा यातायात व्यवस्था कार्यालयको कार्यशैलीमाथि प्रश्न उठाएको छ।
हालै सरुवा भएर आएका कार्यालय प्रमुख सुशील साहको नेतृत्वमा परीक्षा प्रक्रिया अघि बढाउन लागिएको विषयमा समेत चासो व्यक्त गरिएको छ। तर, परीक्षा सञ्चालनमा अनियमितता भएको, कार्यालयका पदाधिकारीले बिचौलियालाई संरक्षण दिएको वा परीक्षार्थीबाट रकम असुली भएको भन्ने आरोपको स्वतन्त्र पुष्टि हुन सकेको छैन। यस विषयमा सम्बन्धित अधिकारीहरूको आधिकारिक धारणा पनि उपलब्ध हुन सकेको छैन।
सवारी चालक अनुमतिपत्र वितरण प्रक्रियालाई निष्पक्ष र विश्वसनीय बनाउन सम्बन्धित निकायले परीक्षा सञ्चालनको अनुगमन गर्नुपर्ने देखिन्छ। साथै, परीक्षार्थीबाट रकम असुली भइरहेको आरोपबारे आवश्यक छानबिन गरी दोषी पाइएमा कानुनअनुसार कारबाही गर्नुपर्ने माग उठ्न सक्ने देखिन्छ।
तपाईको प्रतिक्रिया !