वीरगञ्ज । पर्साको धोबिनी गाउँपालिका–५ मा ६२ वर्षीया लखरजिया देवीको हत्या गरी नगद तथा गरगहना लुटेको आरोपमा पक्राउ परेका तीन जनालाई पर्सा जिल्ला अदालतले पुर्पक्षका लागि थुनामा राख्न आदेश दिएको छ।
अदालतले थुनछेक बहसपछि धोबिनी–५ निवासी २१ वर्षीय चन्दनकुमार पटेलसहित १७ र १५ वर्षका दुई बालकलाई पुर्पक्षका लागि थुनामा राख्ने आदेश दिएको हो। उनीहरूमाथि वृद्धाको हत्या गरी घरबाट नगद तथा गरगहना लुटेको आरोप लागेको छ।
गत असोज ५ गते बिहान करिब ८ बजे लखरजिया देवी आफ्नै घरको दोस्रो तलास्थित कोठामा मृत अवस्थामा फेला परेकी थिइन्। घटनाबारे जानकारी पाएपछि प्रहरीले अनुसन्धान सुरु गरेको थियो।
प्रहरीको अनुसन्धानअनुसार असोज ४ गते राति चोरी गर्ने उद्देश्यले आरोपितहरू वृद्धाको घरमा प्रवेश गरेका थिए। घरभित्र रहेको बाकसको ताला फुटाउने क्रममा आवाज सुनेपछि माथिल्लो तलामा पुगेकी वृद्धाले उनीहरूलाई देखेपछि हत्या गरिएको प्रहरीको दाबी छ। त्यसपछि घरमा रहेको नगद तथा गरगहना लुटेर आरोपितहरू फरार भएको प्रहरी अनुसन्धानबाट खुलेको जनाइएको छ।
घटनाको अनुसन्धानका क्रममा प्रहरीले तीनै जनालाई पक्राउ गरेको थियो। उनीहरूको साथबाट चोरी भएको भनिएका सुनका दुई थान चुरा, केही नगद, प्लास, दुई थान चक्कु तथा घटनासँग सम्बन्धित अन्य सामग्री बरामद गरिएको प्रहरीले जनाएको छ।
यसअघि प्रहरीले तीनै जनाविरुद्ध कर्तव्य ज्यानसम्बन्धी कसुरमा अनुसन्धान अघि बढाएको थियो। अदालतको पछिल्लो आदेशसँगै मुद्दा थप न्यायिक प्रक्रियामा अघि बढ्नेछ।
मुद्दामा जाहेरवालाका तर्फबाट जिल्ला सरकारी न्यायाधिवक्ता आनन्द न्यौपाने तथा अधिवक्ताहरू केसी लामिछाने, आकाश महतो, औरन्जेब अहमद र मेराज अन्सारीले बहस गरेका थिए।
अदालतको आदेश पुर्पक्षका लागि थुनामा राख्ने निर्णय हो। यसलाई अन्तिम दोषसिद्धिका रूपमा लिन मिल्दैन। आरोपितहरूको दोष वा निर्दोषिताबारे अन्तिम फैसला हुन बाँकी छ।
तपाईको प्रतिक्रिया !