छिपहरमाई गाउँपालिकामा ३० कर्मचारीलाई कामकाज नगर्न निर्देशन, तीन दिनभित्र जिन्सी सामग्री बुझाउन आदेश

वीरगञ्ज । पर्साको छिपहरमाई गाउँपालिकाले स्वीकृत दरबन्दीबाहिर कार्यरत ३० जना कर्मचारीलाई कामकाज नगर्न निर्देशन दिएको छ। गाउँ कार्यपालिकाको कार्यालयले २०८३ असोज २३ गते सूचना जारी गर्दै उनीहरूलाई तत्काल कामकाज नगर्न र आफूहरूको जिम्मामा रहेका नगद तथा जिन्सी सामग्री तीन दिनभित्र कार्यालयमा बुझाउन आदेश दिएको हो।

गाउँपालिकाका प्रमुख प्रशासकीय अधिकृत सर्वजीत कुमार झाले जारी गरेको सूचनामा संघीय मामिला तथा सामान्य प्रशासन मन्त्रालयबाट स्वीकृत दरबन्दीबाहिर रहेका कर्मचारीलाई कामकाज नगर्न भनिएको छ। सूचनामा गाउँपालिकाको कार्यालय तथा विभिन्न वडा कार्यालय र स्वास्थ्य संस्थामा कार्यरत कम्प्युटर अपरेटर, न्याय सहयोगी, कार्यालय सहयोगी, गार्ड, चालक, स्टाफ नर्स, पाले, स्वीपर र अनमीसहितका कर्मचारी समेटिएका छन्।

प्रमुख प्रशासकीय अधिकृत झाले ३० जना कर्मचारीलाई कामकाजबाट हटाइएको पुष्टि गर्दै स्वीकृत दरबन्दीबाहिरका कर्मचारीलाई निरन्तरता नदिने बताएका छन्। उनका अनुसार यस विषयमा अख्तियार दुरुपयोग अनुसन्धान आयोग र संघीय मामिला तथा सामान्य प्रशासन मन्त्रालयका पत्रहरू अध्ययन गरी गाउँपालिकाका कर्मचारीहरूसँग छलफलपछि निर्णय गरिएको हो।

“पहिलेदेखि नै दरबन्दीबाहिरका कर्मचारी राखिँदै आएको रहेछ। अब त्यस्तो हुँदैन। मैले गरेको निर्णयबाट पछि हट्दिनँ,” झाले भने।

उनले सम्बन्धित कर्मचारीलाई हाजिर नगराउन कार्यालयमा निर्देशनसमेत दिइसकेको बताए। तीन दिनभित्र जिन्सी सामग्री बुझाउन भनिएको विषयमा सबै कर्मचारीले सामग्री बुझाए वा नबुझाएको भन्नेबारे आफू कार्यालय पुगेपछि यकिन गर्ने र आदेश पालना नगरेको पाइए जिल्ला प्रशासन कार्यालय पर्सालाई पत्राचार गर्ने उनले बताए।

कामकाज रोक्न निर्देशन दिइएका ३० कर्मचारीको विवरण

गाउँपालिकाले जारी गरेको सूचनाअनुसार कामकाज नगर्न निर्देशन दिइएका कर्मचारीहरूको नाम, पद र कार्यरत कार्यालयको विवरण यसप्रकार छ।

तीन दिनभित्र सामग्री बुझाउन निर्देशन

गाउँपालिकाको सूचनामा सम्बन्धित कर्मचारीलाई आफूहरूको जिम्मामा रहेका सम्पूर्ण नगद तथा जिन्सी सामग्री तीन दिनभित्र कार्यालयमा बुझाउन भनिएको छ। सूचनाको बोधार्थ गाउँपालिका अध्यक्ष, उपाध्यक्ष, आर्थिक प्रशासन शाखा, सबै वडा कार्यालय र जिल्ला प्रशासन कार्यालय पर्सालाई समेत दिइएको छ।

स्वीकृत दरबन्दीबाहिरका कर्मचारी हटाउने निर्णयले गाउँपालिकाको सेवा प्रवाहमा कस्तो प्रभाव पार्छ भन्ने विषयमा भने थप स्पष्टता आवश्यक देखिएको छ। विशेषगरी स्वास्थ्य चौकीमा कार्यरत स्टाफ नर्स र अनमीसहितका कर्मचारीलाई कामकाज नगर्न निर्देशन दिइएकाले सम्बन्धित सेवा प्रभावित हुन्छ वा हुँदैन भन्ने विषय चासोको विषय बनेको छ।