वीरगंज। पर्साको जगरनाथपुर गाउँपालिकाले स्थापना भएको साढे ९ वर्षपछि आफ्नै नवनिर्मित प्रशासनिक भवनबाट सेवा प्रवाह सुरु गरेको छ। गाउँपालिका–४, मधुवहामा ३ करोड ३४ लाख रुपैयाँको लागतमा निर्माण गरिएको दुईतले प्रशासनिक भवन बुधबार एक विशेष समारोहबीच उद्घाटन गरिएको हो। नेपाल सरकारका पूर्व उद्योग, वाणिज्य तथा आपूर्तिमन्त्री एवं नेपाली कांग्रेसका पूर्व केन्द्रीय सदस्य तथा प्रतिनिधिसभा सदस्य रमेश रिजालले रिबन काट्नुका साथै शिलालेख अनावरण गरेर भवनको विधिवत् उद्घाटन गरेका हुन्।
गाउँपालिका अध्यक्ष श्रीकान्त प्रसाद यादवको अध्यक्षतामा आयोजित उद्घाटन समारोहमा प्रमुख अतिथि रिजालले रिबन काटेर तथा शिलालेख अनावरण गरेर भवनको उद्घाटन गरेका थिए। त्यसअघि हिन्दु धार्मिक परम्पराअनुसार गाउँपालिका अध्यक्ष यादवले पूजापाठ गरी भवन सञ्चालनको धार्मिक विधि पूरा गरेका थिए। भवनमा गाई प्रवेश गराएर धार्मिक विधिअनुसार कार्यालय सञ्चालनमा ल्याइएको अध्यक्ष यादवले जानकारी दिए। कार्यक्रममा प्रमुख अतिथि रिजालले गमलामा पानी हाल्नुका साथै पानसमा दीप प्रज्वलन गरेर कार्यक्रमको औपचारिक शुभारम्भसमेत गरेका थिए।
उद्घाटनसँगै गाउँपालिकाको प्रशासनिक तथा दैनिक कार्यालयका कामकाज बुधबारदेखि नवनिर्मित भवनबाटै सञ्चालनमा ल्याइएको छ। विगत साढे ९ वर्षदेखि गाउँकार्यपालिकाको कार्यालय वडा नम्बर–४, जगरनाथपुरस्थित मदरसाको भवनबाट सञ्चालन हुँदै आएको थियो। आफ्नै प्रशासनिक भवन नहुँदा कार्यालय सञ्चालन तथा सेवाप्रवाहमा विभिन्न समस्या भोग्दै आएको गाउँपालिकाले अब आफ्नै भवनबाट सेवा दिन थालेपछि प्रशासनिक कामकाज थप व्यवस्थित र सहज हुने अपेक्षा गरिएको छ।
गाउँपालिका अध्यक्ष यादवका अनुसार हाल भवनको भुइँतलाको निर्माण कार्य पूर्ण रूपमा सम्पन्न भएको छ भने माथिल्लो तलाको केही काम अझै बाँकी रहेको छ। बाँकी निर्माण कार्य आगामी मंसिर महिनाभित्र सम्पन्न गर्ने गरी निर्माण कम्पनीलाई निर्देशन दिइएको उनले बताए। भवनको माथिल्लो तलासहित सम्पूर्ण संरचनाको निर्माण कार्य पूरा भएपछि कार्यालय सञ्चालनका लागि थप सहज हुने उनको भनाइ छ।
अध्यक्ष यादवले साढे ९ वर्षसम्म मदरसाको भवनबाट गाउँकार्यपालिकाको कार्यालय सञ्चालन गर्नुपर्दा प्रशासनिक कामकाज तथा सेवाप्रवाहमा कठिनाइ हुँदै आएको उल्लेख गर्दै आफ्नै सुविधासम्पन्न भवन निर्माण हुनु गाउँपालिकाका लागि महत्वपूर्ण उपलब्धि भएको बताए। उनले नयाँ भवनबाट कार्यालयका प्रशासनिक तथा दैनिक कामकाज सञ्चालन गर्न सहज हुनुका साथै सेवाग्राहीले पनि एउटै स्थानबाट सहज रूपमा विभिन्न सेवा प्राप्त गर्न सक्ने बताए।
जगरनाथपुर गाउँपालिकाको प्रशासनिक भवन निर्माणका लागि जग्गाको व्यवस्थापनदेखि बजेट विनियोजनसम्म विभिन्न पक्षको महत्वपूर्ण योगदान रहेको छ। भवन निर्माणका लागि पूर्वमन्त्री रमेश रिजालले १२ कट्ठा जग्गा गाउँपालिकाको नाममा उपलब्ध गराएका थिए। उक्त जग्गा २०८१ फागुन १ गतेको निर्णयअनुसार गाउँपालिकाको नाममा कायम भएपछि प्रशासनिक भवन निर्माणको प्रक्रिया अघि बढाइएको थियो।
गाउँपालिकाको आफ्नै प्रशासनिक भवन निर्माणका लागि जग्गा उपलब्ध गराएर महत्वपूर्ण योगदान पुर्याएको भन्दै उद्घाटन समारोहमा जग्गादाता रिजालप्रति सम्मान तथा कृतज्ञता व्यक्त गरिएको थियो। स्थानीयवासीले समेत गाउँपालिकाको आफ्नै प्रशासनिक भवन निर्माणका लागि निःस्वार्थ रूपमा जग्गा उपलब्ध गराएको भन्दै रिजालको प्रशंसा गर्दै धन्यवाद व्यक्त गरेका थिए।
प्रमुख अतिथि रिजालले गाउँपालिका अध्यक्ष यादवको नेतृत्वमा प्रशासनिक भवन निर्माणको काम अघि बढेर उद्घाटनसम्म आइपुगेकोमा प्रशंसा गर्दै यसले स्थानीय सरकारको सेवा प्रवाहमा महत्वपूर्ण योगदान पुर्याउने विश्वास व्यक्त गरेका थिए।
भवन निर्माणका लागि मधेश प्रदेशसभा सदस्य जनार्दन सिंह क्षेत्रीको संसदीय विकास कोषबाट ६४ लाख रुपैयाँ, जिल्ला समन्वय समिति पर्साबाट ३५ लाख रुपैयाँ र जगरनाथपुर गाउँपालिकाको आन्तरिक बजेटबाट २ करोड ३५ लाख रुपैयाँ विनियोजन गरिएको थियो। तीनवटै स्रोतबाट प्राप्त कुल ३ करोड ३४ लाख रुपैयाँको लागतमा प्रशासनिक भवन निर्माण गरिएको गाउँपालिकाले जनाएको छ।
उद्घाटन समारोहलाई सम्बोधन गर्दै गाउँपालिका अध्यक्ष श्रीकान्त प्रसाद यादवले नवनिर्मित प्रशासनिक भवनलाई जगरनाथपुर गाउँपालिकाको विकास यात्रामा ऐतिहासिक उपलब्धिका रूपमा व्याख्या गरे। उनले भवन केवल इँटा, सिमेन्ट र कंक्रिटबाट बनेको भौतिक संरचना मात्र नभई सुशासन, पारदर्शिता, प्रभावकारी सेवा प्रवाह र समृद्ध जगरनाथपुर निर्माणको महत्वपूर्ण आधार भएको बताए।
अध्यक्ष यादवले गाउँपालिकाको विकास निर्माणसँगै शिक्षा, स्वास्थ्य, सडक, विद्युत् तथा कृषि क्षेत्रको विस्तारलाई प्राथमिकतामा राखेर काम भइरहेको जानकारी दिँदै छोटो समयमै प्रशासनिक भवन निर्माण सम्पन्न हुनु गाउँपालिकाका लागि उपलब्धिमूलक भएको बताए।
‘गाउँपालिका भनेको जनताको आवश्यकता र सुविधालाई केन्द्रमा राखेर काम गर्ने निकाय हो। विकास निर्माणसँगै नागरिकले सहज रूपमा सेवा पाउनुपर्छ। गाउँपालिका सधैँ जनताको साथमा रहेर काम गरिरहेको छ,’ अध्यक्ष यादवले भने।
उनले नवनिर्मित भवनबाट आम नागरिकले सहज, सरल, छिटो र गुणस्तरीय सेवा प्राप्त गर्ने विश्वास व्यक्त गर्दै भवन निर्माणमा सहयोग पुर्याउने जनप्रतिनिधि, कर्मचारी, निर्माण व्यवसायी, स्थानीयवासी तथा सम्पूर्ण सहयोगीप्रति आभार व्यक्त गरे।
त्यसैगरी, गाउँपालिकाका प्रमुख प्रशासकीय अधिकृत सुनिल प्रसाद केशरीले नवनिर्मित प्रशासनिक भवनले कार्यालयको कार्यसम्पादनलाई थप व्यवस्थित, प्रभावकारी र सेवाग्राहीमैत्री बनाउन सहयोग पुग्ने बताए। उनले नयाँ भवनमा उपलब्ध भौतिक सुविधाको सदुपयोग गर्दै सेवाग्राहीलाई छिटो, सहज, पारदर्शी तथा नागरिकमैत्री सेवा उपलब्ध गराउन कर्मचारीहरू जिम्मेवार भएर लाग्नुपर्नेमा जोड दिए।
प्रमुख प्रशासकीय अधिकृत केशरीका अनुसार नवनिर्मित भवनमा १२ वटा कोठासहित बैठक कक्ष तथा कार्यालय सञ्चालनका लागि आवश्यक अन्य संरचनाहरू रहेका छन्। नयाँ भवन सञ्चालनमा आएसँगै गाउँपालिकाको दैनिक प्रशासनिक कामकाज व्यवस्थित हुनुका साथै सेवाग्राहीलाई विभिन्न सेवा लिन सहज हुने अपेक्षा गरिएको छ।
कार्यक्रममा गाउँपालिकाको प्रशासनिक तथा सेवा प्रवाहमा योगदान पुर्याउने विभिन्न कर्मचारीहरूलाई सम्मानसमेत गरिएको थियो। कर्मचारीहरूको काम र योगदानको कदर गर्दै गरिएको सम्मानले उनीहरूलाई थप जिम्मेवार, उत्तरदायी तथा सेवाप्रति प्रतिबद्ध बनाउन सहयोग पुग्ने अपेक्षा गरिएको छ।
उद्घाटन समारोहमा सहभागी वक्ताहरूले प्रशासनिक भवन निर्माण हुनु गाउँपालिकाका लागि महत्वपूर्ण उपलब्धि भए पनि भौतिक संरचना निर्माण मात्रै पर्याप्त नहुने धारणा राखेका थिए। उनीहरूले नयाँ भवनबाट नागरिकले छिटो, सहज, पारदर्शी र प्रभावकारी सेवा पाउने वातावरण निर्माण गर्नुपर्नेमा जोड दिएका थिए। भवनसँगै कर्मचारीको जिम्मेवारी, सेवाग्राहीप्रतिको व्यवहार र सेवा प्रवाहको गुणस्तरमा समेत सुधार हुनुपर्ने उनीहरूको भनाइ थियो।
उद्घाटन समारोहमा मधेश प्रदेश सरकारका वन तथा वातावरणमन्त्री शंकर चौधरी विशिष्ट अतिथिका रूपमा सहभागी थिए। त्यसैगरी, पूर्वमन्त्री एवं मधेश प्रदेशसभा सदस्य जनार्दन सिंह क्षेत्री, वीरगंज महानगरपालिकाका उपप्रमुख इम्तियाज आलम, पटेर्वा सुगौली गाउँपालिकाका अध्यक्ष दिनेश कुमार चौधरी, जगरनाथपुर गाउँपालिका उपाध्यक्ष बबिता सिंह क्षेत्री, जगरनाथपुर गाउपालिकाका प्रमुख प्रशासकीय अधिकृत सुनिल प्रसाद केशरी, लेखापाल सन्देश कुशवाहा, वडा नम्बर–२ का वडाध्यक्ष नेपाली प्रसाद कुशवाहा, जिल्ला प्रहरी कार्यालय पर्साका प्रहरी नायब उपरीक्षक राजु कार्की, इलाका प्रहरी कार्यालय पटेर्वा सुगौलीका प्रमुख प्रहरी निरीक्षक विपन कार्की, इलाका प्रहरी कार्यालय पोखरियाका प्रमुख प्रहरी निरीक्षक भानुभक्त अर्याल तथा इलाका प्रहरी कार्यालय जानकीटोलाका वरिष्ठ प्रहरी सहायक निरीक्षक श्यामबाबु यादवको उपस्थिति रहेको थियो।
त्यसैगरी, सशस्त्र प्रहरीका प्रतिनिधिहरू, वशिष्ट नारायण प्रसाद कुर्मी, रमेश पाण्डे, नेपाली कांग्रेस पर्साका जिल्ला सचिव नवीन सिंह, दीपेन्द्र सिंह, बलिस्टर अहमद, राकेश यादव मितवा, रमेश यादव, प्रह्लाद गिरीलगायत विभिन्न राजनीतिक दलका प्रतिनिधि, अन्य वडाध्यक्ष तथा जनप्रतिनिधिहरू, विभिन्न स्थानीय तहका प्रमुख, उपप्रमुख, अध्यक्ष, उपाध्यक्ष तथा प्रतिनिधिहरू, कर्मचारी, सुरक्षाकर्मी, स्थानीय अगुवा, भद्रभलादमी तथा सर्वसाधारणको उल्लेख्य उपस्थिति रहेको थियो।
कार्यक्रममा गाउँपालिकाका प्रमुख प्रशासकीय अधिकृत सुनिल प्रसाद केशरीले स्वागत मन्तव्य राखेका थिए भने कार्यक्रमको सञ्चालन शिक्षक रुपनारायण साहले गरेका थिए। उद्घाटन समारोहलाई थप आकर्षक बनाउन भोजपुरी गायक सुनिल पण्डित तथा स्थानीय विद्यालयका छात्राहरूले विभिन्न सांस्कृतिक प्रस्तुति दिएका थिए।
गाउँपालिकाको आफ्नै प्रशासनिक भवन निर्माणसँगै लामो समयदेखि अर्को भवनबाट कार्यालय सञ्चालन गर्नुपर्ने बाध्यताको अन्त्य भएको छ। अब नवनिर्मित भवनलाई प्रभावकारी सार्वजनिक सेवा प्रवाहको केन्द्रका रूपमा विकास गर्दै नागरिकलाई छिटो, सहज, पारदर्शी र गुणस्तरीय सेवा उपलब्ध गराउनु गाउँपालिकाको प्रमुख जिम्मेवारी बनेको छ। भौतिक पूर्वाधार निर्माणसँगै सुशासन, जवाफदेहिता र नागरिकमैत्री सेवाप्रवाहलाई व्यवहारमै कार्यान्वयन गर्न सके मात्रै नयाँ प्रशासनिक भवन निर्माणको वास्तविक उद्देश्य पूरा हुने देखिन्छ।
तपाईको प्रतिक्रिया !