वीरगंज । पर्सा प्रहरीले विशेष सूचनाको आधारमा ठूलो परिमाणको चरेशसहित एक जनालाई पक्राउ गरेको छ ।
जिल्ला प्रहरी कार्यालय पर्साले दिएको जानकारी अनुसार मंगलबार बिहान करीब १०:०५ बजे वीरगंज महानगरपालिका–१५, प्रतिमा चोकस्थित सडक क्षेत्रमा चेकजाँचका क्रममा एक व्यक्तिलाई चरेशसहित नियन्त्रणमा लिइएको हो ।
प्रहरी टोलीले संकास्पद रूपमा पैदल हिँडिरहेका एक व्यक्तिलाई रोकेर खानतलासी गर्दा उनीसँग रहेको कालो ब्यागभित्र प्लास्टिकले बेरिएको १० केजी चरेश जस्तो देखिने पदार्थ फेला परेको प्रहरीको भनाइ छ ।
पक्राउ पर्ने व्यक्ति जिल्लाको धोबिनी गाउँपालिका–५ बस्ने ४८ वर्षीय सम्सुल मियाँ रहेको प्रहरीले जनाएको छ । बरामद चरेश एक पोकामा १० किलो भेटिएको हो ।
सम्सुल मियाँलाई लागुऔषध सम्बन्धी कसुरमा नियन्त्रणमा लिई थप अनुसन्धान भइरहेको जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक राजु कार्कीले जानकारी दिए ।
