वीरगंज । पर्सामा सामाजिक सञ्जाल, विशेषगरी फेसबुकमा नक्कली (फेक) आईडीको प्रयोग गरी गालीगलौज गर्ने, व्यक्तिगत मानमर्दन गर्ने तथा एकअर्काविरुद्ध भ्रामक आरोप–प्रत्यारोप फैलाउने गतिविधि बढ्दै गएको भन्दै यसको नियन्त्रणका लागि प्रहरी प्रशासनसँग माग गरिएको छ।
फेसबुकमा विभिन्न व्यक्तिको नाम, तस्बिर र पहिचानको दुरुपयोग गरी नक्कली आईडी सञ्चालन गर्ने तथा त्यस्ता आईडीमार्फत व्यक्ति, समाज र विभिन्न क्षेत्रका अगुवाविरुद्ध अपमानजनक टिप्पणी गर्ने प्रवृत्ति बढ्दै गएकोप्रति सरोकारवालाहरूले चिन्ता व्यक्त गरेका छन्।
विशेषगरी ‘फलानो समर्थक’, ‘चिल्लानो समर्थक’, ‘जिताउ अभियान’ लगायतका नाममा फेक फेसबुक आईडी बनाएर आफूले समर्थन गरेका व्यक्तिको प्रशंसा गर्ने र अर्को पक्षका व्यक्तिविरुद्ध गालीगलौज, व्यक्तिगत आक्षेप तथा तथ्यहीन आरोप लगाउने गतिविधि भइरहेको गुनासो छ।
नक्कली आईडीको आडमा मर्यादित आलोचनाको सीमासमेत नाघेर व्यक्तिको चरित्रहत्या गर्ने, परिवार तथा व्यक्तिगत जीवनलाई जोडेर अपमानजनक टिप्पणी गर्ने र प्रमाणबिनै विभिन्न आरोप लगाउने प्रवृत्तिले सामाजिक सञ्जालको वातावरणसमेत दूषित बनाउँदै लगेको देखिन्छ।
त्यस्तै, केही व्यक्तिले युवाहरूलाई परिचालन गर्ने, मोबाइल सिममा इन्टरनेट डाटा प्याक उपलब्ध गराउने र योजनाबद्ध रूपमा सामाजिक सञ्जालमा आफ्नो पक्षमा प्रचार तथा विपक्षीविरुद्ध नकारात्मक टिप्पणी गराउने गरेको आरोपसमेत सार्वजनिक हुन थालेको छ। यद्यपि, यस्ता आरोपको स्वतन्त्र पुष्टि हुन बाँकी छ।
सामाजिक सञ्जाल विचार अभिव्यक्त गर्ने, सूचना आदानप्रदान गर्ने र स्वस्थ बहस गर्ने माध्यम हो। तर, यसको दुरुपयोग गर्दै गालीगलौज, धम्की, व्यक्तिगत मानमर्दन, भ्रामक सूचना तथा निराधार आरोप–प्रत्यारोप फैलाउने कार्यले व्यक्तिको प्रतिष्ठामा मात्र नभई समाजको आपसी सद्भाव र शान्तिसुरक्षामासमेत असर पार्न सक्ने चिन्ता बढेको छ।
फेक आईडीको प्रयोग गरी कसले के लेख्यो भन्ने पहिचान गर्न कठिन हुने अवस्थाको फाइदा उठाउँदै केही व्यक्तिले सामाजिक सञ्जाललाई व्यक्तिगत रिसइबी साँध्ने र अरूको प्रतिष्ठामा आँच पुर्याउने माध्यम बनाइरहेको गुनासोसमेत छ।
यस विषयमा जिल्ला प्रहरी कार्यालय पर्सा तथा प्रहरी उपरीक्षक पवनकुमार भट्टराईको गम्भीर ध्यानाकर्षण गराउँदै सामाजिक सञ्जालमा सक्रिय फेक आईडीको पहिचान, गालीगलौज तथा अपमानजनक टिप्पणी गर्ने व्यक्तिको खोजी र साइबर दुर्व्यवहारसम्बन्धी आवश्यक अनुसन्धान गर्न माग गरिएको छ।
नक्कली फेसबुक आईडी बनाएर अरूको नाम, तस्बिर तथा पहिचान दुरुपयोग गर्ने, धम्की दिने, चरित्रहत्या गर्ने र योजनाबद्ध रूपमा भ्रामक सामग्री फैलाउने कार्यमा संलग्न व्यक्तिको पहिचान गरी प्रचलित कानुनअनुसार कारबाहीको दायरामा ल्याउन प्रहरी प्रशासनसँग आग्रह गरिएको छ।
सामाजिक सञ्जालमा हुने स्वस्थ आलोचना र विचार अभिव्यक्तिलाई रोक्ने नभई त्यसको आवरणमा हुने गालीगलौज, साइबर दुर्व्यवहार र मानमर्दनका गतिविधिलाई नियन्त्रण गर्नुपर्ने आवश्यकता रहेको सरोकारवालाहरूको भनाइ छ।
पर्सा प्रहरीले यस्ता गतिविधिलाई सामान्य रूपमा नलिई फेक आईडीको पहिचान, साइबर उजुरीको अनुसन्धान तथा दोषीमाथि कानुनी कारबाहीको प्रक्रिया प्रभावकारी बनाउनुपर्ने देखिएको छ। समयमै प्रहरीको ध्यान पुग्न सके सामाजिक सञ्जालमा बढ्दो गालीगलौज, व्यक्तिगत आक्षेप र अनावश्यक आरोप–प्रत्यारोप नियन्त्रण गर्न सहयोग पुग्ने अपेक्षा गरिएको छ।
तपाईको प्रतिक्रिया !