जनकपुरधाम । मधेश प्रदेशमा नयाँ सरकार गठनका लागि विभिन्न दलबीच सहमति भइसकेको चर्चा चलिरहेका बेला जनता समाजवादी पार्टी (जसपा) नेपालका महासचिव एवं पूर्वमुख्यमन्त्री लालबाबु राउतले त्यस्तो कुनै सहमति नभएको स्पष्ट पारेका छन्।
राउतले नेकपा एमाले, नेपाली कांग्रेसलगायत कुनै पनि दलसँग सरकार गठनका विषयमा औपचारिक छलफल नभएको दाबी गरेका छन्। केन्द्रस्तरमा जसपा नेपाल, एमाले र जनमत पार्टीबीच नयाँ सरकार गठनका लागि सहमति भइसकेको भन्ने चर्चा हल्ला र अफवाह मात्रै भएको उनको भनाइ छ।
रातोपाटीसँगको कुराकानीमा राउतले अहिलेसम्म एमाले र कांग्रेससँग सरकार गठनबारे औपचारिक वार्ता नभएको बताए। पार्टी अध्यक्षसँग यस विषयमा कुरा गर्दा पनि अन्य दलसँग औपचारिक छलफल नभएको जानकारी पाएको उनले उल्लेख गरे।
उनले वर्तमान मुख्यमन्त्री कृष्णप्रसाद यादवलाई पहिले प्रदेशसभाबाट विश्वासको मत लिने प्रक्रिया पूरा गर्न दिनुपर्ने बताए। विश्वासको मतको परिणाम नआउँदै नयाँ सरकार गठनबारे हतार गर्न आवश्यक नरहेको उनको धारणा छ।
जसपा नेपाल र जनमत पार्टी नौ दलीय ‘अग्रगामी मोर्चा’मा रहे पनि यी दुई दलको समर्थनले मात्रै सरकार गठनका लागि आवश्यक बहुमत नपुग्ने राउतले बताए। सरकार बनाउन कम्तीमा अर्को एउटा ठूलो दलको समर्थन आवश्यक पर्ने भएकाले कांग्रेस वा एमालेमध्ये कुनै एक दलसँग सहकार्य गर्नुपर्ने अवस्था रहेको उनको भनाइ छ।
राउतले मधेश प्रदेशसभामा २७ सांसदसहित जसपा नेपाल सबैभन्दा ठूलो दल भएकाले आगामी सरकार गठनमा नेतृत्वको दाबी स्वाभाविक हुने बताए। अन्य दलसँग सहमति गरेर सरकार गठन गर्ने अवस्था आए मुख्यमन्त्रीमा जसपाकै दाबी रहने उनले स्पष्ट पारे।
गत असोज ३० गते नेकपा एमाले तीनदलीय गठबन्धन सरकारबाट बाहिरिएपछि मुख्यमन्त्री कृष्णप्रसाद यादव नेतृत्वको सरकार अल्पमतमा परेको छ। त्यसपछि मुख्यमन्त्री यादवले विश्वासको मत जुटाउन विभिन्न दलसँग छलफल गरिरहेका छन्। सरकारमा सहभागी नेपाली कम्युनिस्ट पार्टी (नेकपा)ले भने हालसम्म समर्थन फिर्ता लिएको छैन।
मुख्यमन्त्री यादवले कात्तिक २८ गतेभित्र प्रदेशसभाबाट विश्वासको मत लिनुपर्नेछ। त्यसैले मधेशको राजनीतिक वृत्तमा वर्तमान सरकारको निरन्तरता र नयाँ सत्ता समीकरणको सम्भावनाबारे चासो बढेको छ।
१०७ सदस्यीय मधेश प्रदेशसभामा सरकार गठनका लागि कम्तीमा ५४ सांसदको समर्थन आवश्यक पर्छ। प्रदेशसभामा जसपा नेपालका २७, एमालेका २३, कांग्रेसका २२, नेकपाका १५ र जनमत पार्टीका १२ सांसद छन्। त्यस्तै, संघीय समाजवादी पार्टी र राष्ट्रिय प्रजातन्त्र पार्टीका एक–एक सांसद छन्।
राउतको अभिव्यक्तिले नयाँ सरकार गठनका विषयमा बाहिर आइरहेका राजनीतिक चर्चाबीच जसपा नेपालको आधिकारिक धारणा स्पष्ट पारेको छ।
तपाईको प्रतिक्रिया !